ရိုးရှင်းသော ဗုဒ္ဓ၀င် ( ၂ )

လူ့ ဘောင်ကို စွန့် ခွာလာသော ဂေါတမရဟန်းသည် ပထမဦးစွာ အာဠာရ ကာလာမထံ ချဉ်းကပ်ကာ တရားလမ်းစဉ်များကို လေ့ကျင့်ခဲ့သည်။ အာဠာရကာလာမဧ။် အထွတ်မြတ်ဆုံးတရားသည် အကိဉ္စညာယတနဈာန်ဖြစ်သော အရူပဈာန် လေးပါးမှ တတိယဈာန်ဖြစ်ဧ။်။ ထိုဈာန်တရားသည် ဒုက္ခအားလုံးတို့ ဧ။်ချုပ်ငြိမ်းရာ နိဗာန်တရား မဟုတ်သေးသဖြင့် အာဠာရကာလာမ ထံမှထွက်ခွာခဲ့သည်။

ထို့ နောက် ဥဒကရာမပုတ္တနှင့် တွေ့ ကာ နေ၀သညာ နာသညာယတနဈာန်ကို ရခဲ့ပြန်သည်။ ထိုဈာန်သည်လည်း ချုပ်ငြိမ်းရာအမှန် နိဗာန်တရားမဟုတ်သဖြင့် ဥဒကရာမပုတ္တထံမှ ထွက်ခွာခဲ့ပြန်သည်။

ဟိုမှသည်မှ တရားရှာရလိမ့်နိုးနိုးဖြင့် မဂဓတိုင်းတစ်ခွင် လှည့်လည်ခဲ့နေရာမှ နောက်ဆုံးတွင် ဥရုဝေလတောအုပ်သို့ ဆိုက်ရောက်လာဧ။်။ ထိုအရပ်ဒေသသည် မြေအနေအထားကောင်းကာ တောအုပ်ကလည်း တင့်တောင်းတင့်တယ်ရှိ၏။ မြစ်ငယ်တွင် ရေသည် သန့် ရှင်းကြည်လင်၏။ ပတ်ဝန်းကျင်တစ်ဝိုက်တွင်လည်း ဆွမ်းခံရွာများရှိခြင်းကြောင့် သည်နေရာကား တရားအားထုတ်ရန် အကောင်းဆုံးဟု သတ်မှတ်ရွေးချယ်ခဲ့သည်။ ထိုနေရာတွင် ကိုယ်နှင့် စိတ်အတွင်းမှ အကုသိုလ်စိတ်များကို ခွာချရန်အတွက် အပြင်းအထန်ကြိုးစားအားထုတ်ခဲ့သည်။ အစားအစာကို လျှော့စားကာ ထိုင်ရာမထကျင့်သောကြောင့် နောက်ဆုံးတွင် အရိုးပေါ်အရေတင် သေလုမျောပါး ဝေဒနာကို ခံစားခဲ့ရသည်။ လမ်းစဉ်အမှားအား ၆နှစ်တိုင်တိုင် ကျင့်ခဲ့သောကြောင့် သေလုမျောပါး ဝေဒနာကို ရရှိလာရ၏။ ဤလမ်းစဉ်ကို ဆက်၍ကျင့်ဆောင်နေပါလျင် သေပွဲဝင်ရုံသာ ရှိမည်ကို ဆင်ခြင်မိသော ဂေါတမရဟန်းသည် ထိုလမ်းစဉ်ကျင့်မှုကို ရပ်တန့် ကာ မိမိကျင့်လာခဲ့သော တရားများကို ပြန်လည် ဝေဖန်ဆန်းစစ်ခဲ့သည်။ ထိုနောက် အစားအစာတို့ ကို ပြန်လည်စားသောက်ကာ ပထမဈာန်၊ ဒုတိယဈာန်၊ တတိယဈာန်၊ စတုတ္ထဈာန်တို့ ကို ၀င်စားခဲ့သည်။ ထို့ နောက် ပထမယံတွင် ပုဗ်ဗေနိဝါသဥာဏ် (ဘ၀များစွာ ကျင်လည်ခဲ့သမျှကို ပြန်လည်အောင့်မေ့နိုင်သောဥာဏ်) ။ မဇ္ဈိမယံတွင် ဒိဗ်ဗစက္ခုဥာဏ် (သတ္တ၀ါအနန္တတို့  ထိုထိုဘ၀များသို့  ကံအားလျော်စွာ လားရရောက်ရပုံကို သိမြင်သောဥာဏ်) ။ ဤလောကီဈာန်များကို အခြေပြုကာ ဂေါတမရဟန်းသည် ဒုက္ခကို သိလာခဲ့သည်။ ဒုက္ခဖြစ်စေသော အကြောင်းကို သိလာခဲ့သည်။ ဒုက္ခချုပ်ရာ နေရာကို သိလာခဲ့သည်။ ဒုက္ခချုပ်ရာသို့ သွားသော လမ်းကြောင်းကို သိလာခဲ့သည်။ ဤသို့ သိရှိလာသောကြောင့် လွတ်မြောက်ရာအမှန်တရားကို သိရှိကာ အတုမရှိဘုရားရှင် အဖြစ်ရောက်ရှိလာခဲ့ပါသည်။





(၀ဏ္ဏသီရိရေးသားသော ညီတော်အာနန္ဒာ၏ တစ်သက်တာမှတ်တမ်းကို မှီငြမ်းပါသည်။)