ဘုရားရှင်သည် တရားမှန်အား မည်သူ့ ကို ဟောရပါမည်လဲဟု စဉ်းစားရာတွင် ငါဟောသောတရားကို လျင်မြန်စွာ သိနိုင်သော ပဉ္စ၀ဂ္ဂီ ငါးဦးတို့ ကို ဟောကြားရန် စဉ်းစားမိ၍ ဗာရာဏသီအနီးရှိ မိဂဒါဝုန်တောသို့ ကြွလာခဲ့သည်။ ပဉ္စ၀ဂ္ဂီ ငါးဦး ထံသို့ ရောက်သောအခါ ဘုရားရှင်သည် ငါသည် ဟုတ်တိုင်းမှန်စွာ ဘုရားရှင်အဖြစ်သို့ ရောက်ကြောင်းပြောလျှင် ပဉ္စ၀ဂ္ဂီ ငါးဦးတို့ သည် ဒုက္ကရစရိယာ အကျင့်ကျင့်စဉ်ကပင် တရားထူးကို မရခဲ့သော သူသည် ရပ်တကာ ရွာတကာလှည့်လည်နေကာမှ ဘယ်မှာရနိုင်လိမ့်မည်နည်းဟု ဆိုကာ တရားနာရန် ငြင်းဆန်ကြသည်။ ဘုရားရှင်က အသင်တို့ ထင်သည့်အတိုင်း မဟုတ်ကြောင်းရှင်းကာ ဒုတိယအကြိမ်၊ တတိယ အကြိမ် ထပ်မံခေါ်ကာ ရှင်းပြရလေသည်။ နောက်ဆုံးတွင် ဘုရားရှင်က ရဟန်းတို့ ငါသည် အဘယ်တုန်းကများ သင်တို့ ကို ဤသို့ သောစကားမျိုး ပြောဘူးပါသလော ဟုမေးရာ မပြောဘူးကြောင်းကို ဖြေကြားကာ ဘုရားရှင်၏ တရားကို နာကြားကြလေသည်။
ထိုအချိန်ကာလက ကာမဂုဏ်အာရုံကို မှီဝဲသူတို့ သည်လည်း ယမ်းကုန်မီးကုန်ပျော်ပါးနေ၍၊ တရားရှာသူတို့ သည်လည်း မိမိ၏ခန္ဓာကို မီးကုန်ယမ်းကုန် နှိပ်စက်ညှင်းပန်းကာ ရှာနေချိန်ဖြစ်သည်။
ထို့ ကြောင့် ဘုရားရှင်သည် ပထမဦးစွာ ထိုအစွန်းနှစ်ဖက်ဖြစ်သော အယုတ်တရားကို မကျင့်ရန်ပြောလေသည်။ ထိုတရားနှစ်ပါးသည် ဘုရားရှင်ကိုယ်တိုင် တွေ့ ကြုံခဲ့သော အယုတ်တရား ၂ ပါးလည်းဖြစ်ပေသည်။ ဘုရားရှင်သည် ထို ၂ပါးတို့ မှ လွတ်သော အလယ်အလတ်လမ်းစဉ် မဇ္ဈိမ ပဍိပဒါအကျင့် ကိုထိုးထွင်း သိမြင်ခဲ့သည်။ ထိုလမ်းစဉ်သည်ကား ----------------------
(၁) သမ္မာဒိဌိ ကောင်းစွာအယူကို ယူခြင်း (ရာဂ၊ ဒေါသ၊ မောဟ ဖြစ်စရာ မကောင်းသောအယူကို မယူခြင်း)
(၂) သမ္မာသင်္ကပ္ပ ကောင်းစွာကြံစည်ခြင်း (ရာဂ၊ ဒေါသ၊ မောဟ ဖြစ်စရာ မကောင်းသော အကြံကို မကြံခြင်း)
(၃) သမ္မာဝါစာ ကောင်းစွာပြောဆိုခြင်း (မကောင်းသောစကား ပြောဆိုခြင်းမှ ရှောင်ခြင်း)
(၄) သမ္မာကမ္မ န္တ ကောင်းစွာပြုလုပ်ခြင်း (မကောင်းသော အပြုအမူကို ရှောင်ခြင်း)
(၅) သမ္မာအာဇီဝ ကောင်းစွာအသက်မွေးခြင်း (မကောင်းသော အရာပြုလုပ်၍ အသက်မွေးခြင်းမှ ရှောင်ခြင်း)
(၆) သမ္မာဝါယာမ ကောင်းစွာအားထုတ်ခြင်း( မဆုတ်မနစ် အားသစ်စိုက်ထုတ်ခြင်း)
(၇)သမ္မာသတိ ကောင်းစွာအောက်မေ့ခြင်း (မမေ့မလျော့ တရားသဘောသက်ဝင်ခြင်း)
(၈) သမ္မာသမာဓိ ကောင်းစွာတည်ကြည်ခြင်း (တရားအသိအမြင် တည်ကြည်ခိုင်ခံ့ခြင်း)
ဤရှစ်ပါးကို သီလ၊ သမာဓိ၊ ပညာ ဟူ၍ သုံးပါးဖြင့် ပြဆိုလျှင်
ကောင်းစွာ ပြောဆိုခြင်း၊ ကောင်းစွာပြုလုပ်ခြင်း နှင့် ကောင်းစွာ အသက်မွေးခြင်းသည် သီလမဂ္ဂင်ဖြစ်သည်။
ကောင်းစွာ အားထုတ်ခြင်း၊ ကောင်းစွာ အောက်မေ့ခြင်း နှင့် ကောင်းစွာ တည်ကြည်ခြင်းသည် သမာဓိမဂ္ဂင်။
ကောင်းစွာ အယူ ယူခြင်းနှင့် ကောင်းစွာ ကြံခြင်းသည် ပညာမဂ္ဂင်ဖြစ်သည်။ `
ဤမဂ္ဂင်အကျင့်ကို ကျင့်ခြင်းအားဖြင့် ဒုက္ခချုပ်ရာအမှန် နိရောဓသစ္စာဟုခေါ်သော နိဗာန်ကို ရပေလိမ့်မည်။
နိရောဓသစ္စာသည် အထင်အရှားရှိနေပါလျက် အမှန်အတိုင်း မမြင်တွေ့ နိုင်ခြင်းမှာ ဒုက္ခကို ဒုက္ခဟူ၍ မသိခြင်းကြောင့် ဖြစ်ပေသည်။ ထို့ ကြောင့် ဒုက္ခသစ္စာ ဆိုသည်မှာ အိုခြင်း ဆင်းရဲ၊ နာခြင်း ဆင်းရဲ၊ အသစ်တစ်ဖန် ပေါ်ခြင်း ဆင်းရဲ၊ မချစ်ခင် မနှစ်သက်သော သက်ရှိ သက်မဲ့ သင်္ခါရ တို့ နှင့် ပေါင်းရခြင်း ဆင်းရဲ၊ ချစ်ခင်နှစ်သက်အပ်သော သက်ရှိသက်မဲ့ သင်္ခါရတို့ နှင့် ကွေကွင်းရသောဆင်းရဲ၊ တောင့်တတိုင်း လိုချင်တိုင်း မရခြင်း မပြည့်စုံခြင်း ဆင်းရဲ၊ တို့ ဖြစ်ပေသည်။ ထိုဒုက္ခကို ဖြစ်စေသော အကြောင်းတရားကို သမုဒယသစ္စာဟု ခေါ်လေသည်။
သမုဒယသစ္စာ ဆိုသည်မှာ နှစ်သက်ခြင်း တပ်မက်ခြင်းနှင့် တကွဖြစ်သော ကာမဂုဏ်တို့ ၌ ခုံမင်တတ်သော တဏှာဖြစ်သည်။
ကာမ တဏှာ အဆင်း၊ အသံ၊ အတွေ့ ၊အရသာ စသော ပြင်ပအာရုံကို ခင်တွယ်သောစိတ်
ဘ၀ တဏှာ ဘ၀သည် ထာဝရတည်မြဲနေသည်ဟု စွဲလန်းခြင်း တဏှာ
ဝိဘ၀ တဏှာ သေလျှင် ဘာမှမရှိ အားလုံးပြတ်သည်ဟု ယူဆစွဲနေသော တဏှာ
အချုပ်အားဖြင့် ဆိုရလျှင် စွဲလန်းတဏှာများကြောင့် ဒုက္ခများစွာ ပေါ်ပေါက်နေသဖြင့် ၎င်း ဒုက္ခငြိမ်းစေရန် မဂ္ဂင်တည်းဟူသော လမ်းစဉ်ကို ကျင့်ကာ ဒုက္ခအပေါင်းမှ ငြိမ်းစေသော နိရောဓသစ္စာမည်သော နိဗာန်ကိုရနိုင်သည်။
ဒုက္ခကို သိကာ သမုဒယကို စွန့် ပယ်၍ နိရောဓကို မျက်မှောက်ပြုရန် မဂ္ဂသစ္စာကို ပွားများရပေမည် ဟု ဘုရားရှင်မှ ဆုံးမဟောကြားခဲ့လေသည်။
(၀ဏ္ဏသီရိရေးသားသော ညီတော်အာနန္ဒာ၏ တသက်တာမှတ်တမ်းကို မှီငြမ်းပါသည်)
Subscribe to:
Post Comments (Atom)
No comments:
Post a Comment